Monday, 6 May 2019

Matahari Terbit Di Bumi Kampung Kem Pulau Mumiang, Sabah.



Setiap kali sia masuk mengajar di Pulau Mumiang nih memang ndak pernah sia ketinggalan mau shoot gambar masa matahari baru mau naik. Nah, sia kasik tau sama kamurang yang belum pernah pigi ini tempat, view nya memang lah sangat 'Awesome' orang putih bilang.

Sia rasa sangat damai dan tenang saja itu hati sama sia punya kepala kosong saja macam indada masalah saja (padahal betimbun-timbun). Yang best nya lagi awal-awal pagi kamurang nampak la mangak nelayan satu demi satu keluar ke laut mencari rezeki untuk keluarga. Nah kalau orang bandar jam 5.30 pagi tu masih lagi ada yang membuta sama selimutnya.

Kamurang bayangkan bah time sia shoot ini gambar, sia sambil minum kupi lagi oh. Mau kasik lagi kick itu kupi nah makan sama kontok-kontok bah baru ngam - mantap bah kan urang Sabah. Baru kupinya tu yang cap lampu tu kaw-kaw lagi dibuat, mana bah kamurang mau cari nikmat hidup begini.

Bah, sia lama baini sudah tidak menulis disebabkan talampau sibuk kunun sampai behabuk sudah rumah ku di sini. Kamurang ingat senang kah mau menulis mau kasik pembaca siok membaca. Kalau ndak siok cerita mu neh taik lah dorang mau datang kamurang punya blog atau portal.

Sebelum nih aku tulis dalam BI tapi entah tiba-tiba kepikiran pula sia untuk menulis dalam bahasa Sabah. Macam siok bah kalau kita menulis guna bahasa asal kita macam sia rasa dekat betul sama yang membaca ini. Lagi pun, sia mau kasik angkat bah ini bahasa Sabah nih supaya pembaca luar dari Sabah boleh belajar kan. Kamurang fikir la orang putih tu berabis dorang belajar bahasa Sabah, sedang kan kita pula berabis lupa bahasa asal tembuni kita.

Dari situ terus sia rasa tercabar mau kasik level UP bahasa Sabah nih ke peringkat yang lebih tinggi. Jadi sia harap akan lebih ramai pembaca yang perasan dengan perubahan penggunaan bahasa sia di sini. Sebelum tutup kadai, sia mau ucap terima kasih dulu sama pembaca setia sia yang rajin datang jalan-jalan di blog sia ini. Sia ndak janji mau kasik share cerita yang meletop-letop sama kamurang tapi sia akan cuba la ya. Jangan ja kamu jerak sana ah :). Bah jumpa next posting ah jangan nakal-nakal dan jaga diri.



Lat Tina Sepet
Sumandak Sabah


No comments:

Post a Comment

Thanks for your comments much appreciated !